Os pasados 9 e 10 de febreiro a delegación ‘Western Rail Star Journey’ da Universidade de Tsinghua visitou a Universidade de Santiago de Compostela (USC) para promover o intercambio académico e a investigación. No Instituto de Estudos e Desenvolvemento de Galicia (IDEGA) reuniuse co seu director, Rubén Lois González, e o profesor Diego Sande Veiga.
Na súa xuntanza, o IDEGA e a delegación de Tsinghua coincidiron na importancia da transición cara a unha mobilidade eléctrica e intelixente para equilibrar a protección do patrimonio histórico da capital galega coas necesidades dos residentes. Rubén Lois subliñou que a cooperación académica entre China e Europa é fundamental para enfrontar os retos globais actuais como o cambio climático. O intercambio centrouse na formación de talentos interdisciplinarios e a construción de sistemas de transporte intelixente (ITS), abordando temas como a aplicación de disciplinas básicas, a gobernanza urbana e a innovación educativa, fortalecendo así os lazos académicos entre ambas institucións.
A delegación tamén mantivo diálogos co Conselleiro de Educación da Xunta de Galicia, Román Rodríguez, autoridades universitarias e académicos da USC. A axenda en Santiago incluíu visitas ao Centro de Supercomputación de Galicia (CESGA), o CiTIUS (Centro de Investigación en Tecnoloxías Intelixentes), a Facultade de Matemáticas e a Facultade de Ciencias Económicas e Empresariais.
Fundada en 1911, a Universidade de Tsinghua é unha institución de investigación integral de primeiro nivel en China. Baixo o lema ‘Superación constante e virtude social’, a universidade distínguese por un estilo académico que integra as culturas de Oriente e Occidente, conectando o pasado co presente mediante unha profunda sinxerxía entre as humanidades e as ciencias.
