O xoves 4 de xuño, ás 19:00h, na Sala de Xuntas do Decanato da Facultade de Xeografía e Historia, terá lugar o Seminario de Futuros Urbanos (SFU) sobre a cuestión: “Que naturaleza(s) son posibles nunha cidade de moi rápido crecemento? A planificación ambiental contemporánea en Perth (Australia) a debate”, impartido pola profesora da Universidade de Western Australia (UWA) Natasha Pauli. Estará seguido por unha discusión aberta a todas as persoas presentes.
Máis de dous millóns de habitantes de Perth viven nunha paisaxe ancestral situada nun dos 36 puntos críticos (ou ‘hotspots’) de biodiversidade recoñecidos mundialmente. Como capital do estado de Australia Occidental, rico en recursos minerais, a pegada suburbana da cidade esténdese progresivamente desde o centro, abarcando agora máis de 120 quilómetros da costa do Océano Índico. A cidade tamén se atopa en primeira liña dos impactos do cambio climático, experimentando décadas de diminución constante das precipitacións e aumento das temperaturas. A profesora Natasha Pauli explorará como os marcos de planificación ambiental, tanto pasados como presentes, relaciónanse cos cambios económicos e demográficos, con especial énfase nas iniciativas para promover a naturalización urbana e o deseño urbano sensible á auga nun clima cada vez máis cálido e seco.
Pauli é xeógrafa ambiental especializada no estudo das relacións entre sociedade e natureza en contornas biodiversas e en ámbitos dominados por usos antrópicos. A súa investigación céntrase no coñecemento local, o uso sostible dos recursos naturais, os servizos ecosistémicos e a integración socioambiental na xestión e planificación ambientais, tanto en áreas rurais como urbanas. Conta cunha ampla experiencia profesional en consultoría para empresas e administracións públicas, así como no deseño de políticas internacionais de conservación. Desenvolveu unha sólida traxectoria de traballo de campo en América, en Asia e no Pacífico.
